Farg‘ona viloyati pedagogik mahorat markazi — hududdagi pedagog      kadrlarning   kasbiy salohiyatini oshirish, ularni zamonaviy ta’lim texnologiyalari va innovatsion yondashuvlar bilan tanishtirishga xizmat qiluvchi yetakchi ta’lim muassasalaridan biridir. Mazkur markaz ilgari o‘qituvchilar malakasini oshirish kurslari sifatida faoliyat yuritgan bo‘lib, bugungi kunda o‘z faoliyatini yanada kengaytirib, zamon talablariga mos ravishda takomillashtirilgan tizim asosida ishlamoqda.

Hozirgi kunda markazda har oy o‘rtacha 1000 nafarga yaqin pedagog xodimlar o‘z malakasini oshirib, ta’lim sohasidagi eng so‘nggi yangiliklar, ilg‘or pedagogik texnologiyalar va innovatsion metodikalarni o‘rganib bormoqda. Bu esa ta’lim sifatini oshirish va o‘quv jarayonini samarali tashkil etishda muhim omil bo‘lib xizmat qiladi.

Bundan tashqari, markazda turli yo‘nalishlar bo‘yicha qayta tayyorlov kurslari ham tashkil etilgan bo‘lib, ular orqali pedagoglar o‘z mutaxassisligini kengaytirish, yangi bilim va ko‘nikmalarni egallash imkoniyatiga ega bo‘lmoqdalar.

Markaz faoliyatining asosiy maqsadi — pedagoglarning kasbiy mahoratini muntazam rivojlantirish, ta’lim tizimiga zamonaviy yondashuvlarni joriy etish hamda malakali, raqobatbardosh kadrlarni tayyorlashdan iborat.